第四代妹仔

人類總是要犯下同樣的錯誤。現在不少人會因為一款新穎的潮物而為之瘋狂,即使這一件潮物已證實有缺憾,仍然會願意花寶貴的時間及金錢去追捧它!不過,同樣的情況早於數百年前的古代亦一樣會發生。當「販賣人口」在這個社會仍然合法的時候,我們在某一家客棧會聽到類似的話︰

「講起我就扯火嘞!話說最近坊間流傳第一批來自番邦嘅妹仔,個個都話呢一批妹仔屬於第四代,唔單只外貌不凡,做事效率特別高,聽聞仲飽讀詩書添!我都唔明白咁高質素嘅女子點解要去做妹仔!佢哋入皇宮做後宮佳麗都得啦!不過呢一班妹仔都唔平,買一個十六歲妹仔返嚟盛惠五千文錢!三十二歲妹仔仲貴!要六千文錢!咁我咁啱需要一個妹仔返嚟幫我揼骨,又聽啲人講呢班妹仔有幾咁好,咪諗住買一個妹仔返嚟囉!

「哈!點知要買個妹仔返嚟都唔容易!我要等到開賣日,親自去位於中原嘅人力市場門口!仲要等到子時先至開賣!我唔使瞓覺咩兄台!最慘嘅就係去到人力市場門口,發現嗰度已經有成二千位兄台排緊隊!似乎呢班妹仔真係好受歡迎!結果我等咗足足五個時辰,先至帶到一個十六歲嘅妹仔返嚟咋。三十二歲嗰啲妹仔,晨早畀前面啲兄台揀晒嘞!

「花咗五千文錢帶咗個妹仔返歸,諗住佢好掂啦。哈!點知就出事嘞。個妹仔樣貌都算唔錯!弊就弊在,佢身體某啲部位,係唔掂得㗎!你唔好誤會呀!我唔會亂咁搞我啲妹仔㗎!我買佢返嚟只係想佢幫我揼骨嗟!偏偏佢左手無啦啦有一個穴位,每次佢幫我揼骨,佢左手個穴位掂到我皮膚,佢就會好似點中咗死穴咁,郁都唔郁!佢幫唔到我揼骨,咁我買佢返嚟做乜鬼嘢呀兄台?我嘗試返去人力市場同店家理論,佢竟然叫我幫佢戴番對手套,咁咪解決到問題囉!掉哪媽!佢咁算乜嘢服務態度呀兄台?

「好彩我今日收到消息,話芒角有個好大嘅二手人力市場,嗰度嘅商人會高價回收呢班第四代妹仔!咁我咪將我個妹仔帶去芒角賣番出去囉!你估吓最後個妹仔賣到幾多文錢?係一萬文錢呀!你都唔信哩!我都估唔到最後仲賺咗一倍文錢呀!聽聞二手人力市場班商人會將呢班妹仔轉手畀外省班兄台,話佢哋好想買呢班第四代妹仔喎!咁貴又有缺陷嘅妹仔,外省兄台都肯出更貴嘅價錢去買?呢班兄台係咪黐線㗎???」

發表者:stripeboy

斑紋:人們說「百無一用是書生」,我說「萬無一用是斑紋」。

發表留言

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

%d 位部落客按了讚: