最近 H 城發生了一宗「疑似情緒病人襲擊途人」的個案。2046 年 8 月 8 日下午，一名男子於下環世紀廣場不斷掌摑在場的途人。現場保安及多名接報到場的警員花了半個小時，終於將這一名男子制服。
為什麼這一名男子會無緣無故掌摑現場的途人呢？根據心理病醫生的分析，該名男子很可能已患上一種目前相當普遍的情緒病「鬱躁症」。我們亦在這名男子的家中，找到一本屬於該名男子的日記。為了公眾的利益著想，以下我們會公開這一名男子的部份日記內容。由於該男子是以一種已經失傳的方言來寫日記，我們選擇以「原汁原味」的方式轉載這些日記內容，除了日記當中明顯屬於粗言穢語的內容，為了維持傳播界良好道德規範而一一刪掉。
一
今日天晴，陽光普照。
今日我響街撞返「前度」阿珍，多年冇見，佢仲係咁靚，只不過係佢好似比以前多咗幾分憔悴。
我同佢傾咗唔係好耐，我就話自己有事走先。對住「前度」，我都係小心啲好。如果唔係，點解佢拖住嗰隻狗，會對住我狂吠？
我驚，係驚得有道理嘅！
二
今日天陰，我已經有啲唔多老黎嘅感覺！
今日出街，我好肯定，途人都望住我，仲要係不懷好意咁望住我！
聽聞話而家 H 城人生活壓力指數爆燈！唔知咩嘢「抑鬱症」、「躁狂症」或者咩嘢「鬱躁症」，已經好似傷風感冒咁普遍！
睇嚟以後我一定要加倍小心！
三
今日，我響巴士站等巴士返工嘅時候，聽到兩名師奶嘅對話！
「嘩！而家啲鬱躁症病人真係好恐怖㗎！佢哋會周圍掌摑人㗎！你見到佢哋一定要快啲走！千祈唔好畀佢哋掌摑到！聽聞話鬱躁症會透過掌摑傳染㗎！」
「係真唔係呀！」
「珍珠都冇咁真！我咪同你講過我隔離屋個男人最近short short地嘅？佢上個月被佢女朋友當眾摑咗佢一巴！當時全大廈嘅人都知！男人而家九成九患咗鬱躁症啦！你見到呢啲人，好快啲掉頭走！」
我聽到後，忍唔住問兩位師奶：「係唔係真係咁＿恐怖呀？」
點知嗰兩位師奶見到我，就好似見到鬼咁，粒聲唔出就即刻走咗！
師奶你哋唔係咁樣對我呀？
不過，我都係唔好諗咁多！返到公司，我仲要對住嗰位「黑面神」上司！
四
我不斷同自己講！無謂自己嚇自己！
我要尋找真相！
我上網搜尋一下，響「偽基百科」搵到呢一段資料：
鬱躁症（manic depressive disorder）：現在醫學術語雙相障礙（Bipolar Affective Disorder或bipolar disorder），屬於情緒病的一種。躁鬱症大多發於17、18歲，其主要特徵為患者會不斷經歷躁狂（mania）與抑鬱（depression）等兩種相反極端情緒，而經常反覆出現，其強度與持續時間均大於一般人平時的情緒起伏。正因為有躁有鬱，因此躁鬱症又被稱為雙相障礙（bipolar disorder）。相對於單向的躁狂症與抑鬱症，這些是單相障礙（unipolar disorder）。
但係，我再睇落去，發現好恐怖嘅資料！
近年鬱躁症已經逐漸發展為傳染病，患者會透過掌摑他人而將病毒不斷擴散……。
我＿！坊間流傳鬱躁症患者會傳染他人，原來係真㗎？
五
嘩！今日真係嚇＿死我嘞！
今日一返到公司，就見到女秘書指住「黑面神」上司狂鬧，仲要係「鬧到飛起」嗰隻！
女秘書鬧人不特止，仲摑咗「黑面神」上司一巴！
最恐怖嘅就係，當女秘書同埋「黑面神」見到啱啱返嚟嘅我，忽然一齊望住我！
佢哋嘅眼神，就好似「獵鷹見到獵物」咁樣！
我見到唔多對路！仲唔用盡一生人最快嘅短跑速度，第一時間逃離現場咩！
嚇＿死我！我以後都唔＿返公司嘞！！！
六
我唔知自己有幾多日冇出過街嘞。
而家出面，應該已經好似電影「28日後」咁樣，成條街都係「見人就摑」嘅喪屍啩？
但係，咁嚴重嘅災難，點解報紙唔講，電視唔報嘅呢？
莫非，全城嘅傳媒，都已經被＿＿咗？
七
其實我一早知道！三十六年前，當裁判法院宣布「鬱躁症病人無罪」嘅時候，就已經種下咗禍根！
唔知係邊一位心理病醫生講，全 H 城有成十八萬市民患有鬱躁症！如果鬱躁症病人被視為無罪，咁即係全 H 城有成十八萬市民攞咗「免死金牌」？佢哋就可以做咩都得？咁唔怪得知鬱躁症會發展成疫症啦！
咪住！全 H 城有十八萬市民有病，已經係四十年前嘅數據！而家患病嘅人愈來愈多！會唔會全 H 城嘅人都有病㗎？
咁即係……連我都有病？？？
但係……呢排我好似冇畀人掌摑過喎？
還是呢班病人襯我瞓緊覺嘅時候掌摑我？
八
我已經幾多日冇瞓呢？
我忽然省起，十年前阿珍同我分手嘅時候，曾經好大力咁摑咗我一巴！當時嗰種痛，而家我仲好記得！
會唔會，係阿珍十年前已經有病，佢摑咗我一巴，將病毒傳染咗畀我！但係當時我仲有抵抗力，仲未病發？
到而家，我終於要病發嘞！我已經係一個病人！唔再係正常人嘞！
九
或者，未被掌摑嘅小朋友，可能仲生存緊？
I NEED TO LEAVE!!!
stripeboy.com 2021 